News - 2024
നോട്രഡാം കത്തീഡ്രലിലെ അഗ്നിബാധയ്ക്കു ഒരു വര്ഷം
സ്വന്തം ലേഖകന് 16-04-2020 - Thursday
പാരീസ്: 850 വര്ഷത്തിലേറെ പഴക്കമുള്ള ഫ്രാന്സിലെ പുരാതന ദേവാലയമായ നോട്രഡാം കത്തീഡ്രലില് അഗ്നിബാധയുണ്ടായിട്ട് ഇന്നലെ ഒരു വര്ഷം പൂര്ത്തിയായി. 2019 ഏപ്രില് 15നാണ് പുനര്നിര്മ്മാണ പ്രവര്ത്തനങ്ങള് നടക്കുന്നതിനിടെ ലോകത്തെ തന്നെ കണ്ണീരിലാഴ്ത്തിയുള്ള അഗ്നിബാധ ദേവാലയത്തില് ഉണ്ടായത്. മണിക്കൂറുകള് നീണ്ട പരിശ്രമത്തില് ദേവാലയ ഗോപുരത്തിന്മേലുണ്ടായിരുന്ന തീ അണച്ചുവെങ്കിലും ഗോപുരം പൂര്ണ്ണമായും കത്തിനശിച്ചു. നാനൂറിൽ പരം അഗ്നിശമനസേനാ പ്രവർത്തകർ ഒന്നിച്ചു പ്രവർത്തിച്ചാണു അന്നു തീയണച്ചത്.
യേശുവിനെ ധരിപ്പിച്ച മുള്മുടി കാലകാലങ്ങളായി ഈ ദേവാലയത്തിലാണ് സൂക്ഷിച്ചിരിന്നത്. കത്തീഡ്രലില് അഗ്നിബാധയുണ്ടായതിനെ തുടര്ന്ന് തിരുശേഷിപ്പ് പാരീസിലെ സെന്റ് ജെര്മ്മെയ്ന് ദേവാലയത്തിലേക്ക് മാറ്റി. ഇക്കഴിഞ്ഞ ദുഃഖ വെള്ളിയാഴ്ച തിരുശേഷിപ്പ് ദേവാലയത്തിലെത്തിച്ച് ഓണ്ലൈനിലൂടെയുള്ള വണക്കത്തിന് ദേവാലയം അവസരമൊരുക്കിയിരിന്നു. നേരത്തെ ഓരോ വര്ഷവും ലക്ഷക്കണക്കിന് ആളുകളാണ് ദേവാലയം സന്ദര്ശിക്കുവാന് എത്തിക്കൊണ്ടിരിന്നത്. ഏതാണ്ട് 200 വര്ഷം നീണ്ട പണികള്ക്കു ശേഷം 12ാം നൂറ്റാണ്ടിന്റെ മധ്യത്തോടെ തുറന്ന ദേവാലയം യുനെസ്കോയുടെ ലോക പൈതൃക പട്ടികയില് ഇടം നേടിയിരിന്നു. യുദ്ധത്തെയും വിപ്ലവത്തെയും അതിജീവിച്ച് നൂറ്റാണ്ടുകള് ഫ്രാന്സിന്റെ പ്രതീകമായി നിന്ന ആരാധനാലയം കൂടിയായിരിന്നു നോട്രഡാം കത്തീഡ്രല് ദേവാലയം.
ക്രൈസ്തവ ലോകത്തെ ഓരോ ചലനങ്ങളും ഉടനടി അറിയുവാന് ആഗ്രഹിക്കുന്നുവോ? പ്രവാചക ശബ്ദത്തിന്റെ വാട്സാപ്പ്/ ടെലഗ്രാം ഗ്രൂപ്പുകളിലേക്ക് സ്വാഗതം
➤ വാട്സാപ്പ് ഗ്രൂപ്പിൽ അംഗമാകുവാൻ ഇവിടെ ക്ലിക്ക് ചെയ്യുക
➤ ടെലഗ്രാം ഗ്രൂപ്പിൽ അംഗമാകുവാൻ ഇവിടെ ക്ലിക്ക് ചെയ്യുക