India - 2024
ക്രിസ്തു ശിഷ്യന്റെ വിശ്വാസം പ്രഘോഷിച്ച് നിരണം തീര്ത്ഥാടനം
സ്വന്തം ലേഖകന് 03-07-2017 - Monday
ചങ്ങനാശേരി: മാർതോമ്മാശ്ലീഹായുടെ ദുക്റാന തിരുനാളിനോടനുബന്ധിച്ച് അതിരൂപത യുവദീപ്തി- എസ്എംവൈഎമ്മിന്റെ നേതൃത്വത്തിൽ സംഘടിപ്പിച്ച 13-ാമത് നിരണം തീർഥാടനത്തില് നൂറുകണക്കിനു വിശ്വാസികൾ പങ്കെടുത്തു. രാവിലെ എട്ടിനു ചങ്ങനാശേരി സെന്റ് മേരീസ് മെത്രാപ്പോലീത്തൻ പള്ളിയിൽ പൂർവപിതാക്കന്മാരുടെ കബറിടത്തിങ്കൽനിന്ന് ആരംഭിച്ച തീർഥാടനം ആർച്ച്ബിഷപ് മാർ ജോസഫ് പെരുന്തോട്ടം കത്തിച്ച തിരി അതിരൂപത പ്രസിഡന്റ് നിധിൻ ജോസഫിനു കൈമാറി ഉദ്ഘാടനം ചെയ്തു.
വികാരി ഫാ. കുര്യൻ പുത്തൻപുര സന്ദേശം നൽകി. തുടർന്ന് ആരംഭിച്ച തീർഥാടനം ളായിക്കാട് സെന്റ് ജോസഫ്സ്, വേങ്ങൽ സെന്റ് മേരീസ് മലങ്കര കത്തോലിക്കാ പള്ളി എന്നിവിടങ്ങളിലെ സ്വീകരണങ്ങൾ ഏറ്റുവാങ്ങി നിരണം തീർഥാടന കേന്ദ്രത്തിൽ സമാപിച്ചു. ആർച്ച്ബിഷപ് മാർ ജോസഫ് പെരുന്തോട്ടം കൽവിളക്കിൽ ദീപം തെളിച്ചു സന്ദേശം നൽകി. അതിരൂപത വികാരിജനറാൾ മോണ്. മാണി പുതിയിടം വചനസന്ദേശം നൽകി. യുവദീപ്തി അതിരൂപത ഡയറക്ടർ ഫാ. ജേക്കബ് ചക്കാത്തറ വിശുദ്ധ കുർബാനയർപ്പിച്ചു.
ഫാ. ടിബിൻ ചെറുപുരക്കൽ, ഫാ. മാത്യു നടമുഖം, ലാലിച്ചൻ മറ്റത്തിൽ, ഷിജോ മാത്യു, മിഥുൻ പി.എം, നിജോ തെങ്ങണാപ്പറന്പിൽ, അഖിൽ ജോസ്, ജിതിൻ തോമസ്, ജെസ്നാ ജോജി, എമിൽ ട്രീസാ ജോസ്, സ്നേഹ സെബാസ്റ്റ്യൻ എന്നിവർ നേതൃത്വം നൽകി. ദുക്റാന തിരുനാൾദിനമായ ഇന്നു 12.30ന് എടത്വ ഫൊറോനയിൽനിന്നുള്ള തീർഥാടനം എത്തിച്ചേരും. 12.45ന് വിശുദ്ധ കുർബാന, എടത്വാ വികാരി ഫാ. ജോണ് മണക്കുന്നേൽ കാർമികത്വം വഹിക്കും. തുടർന്ന് കൊടിയിറക്കുന്നതോടെ തീര്ത്ഥാടനത്തിന് സമാപനമാകും.