India - 2024
ദൈവദാസന് മാര് ഈവാനിയോസിന്റെ കബറിടത്തിലേക്കുള്ള തീര്ത്ഥാടന പദയാത്രകള്ക്ക് നാളെ തുടക്കം
സ്വന്തം ലേഖകന് 08-07-2017 - Saturday
തിരുവനന്തപുരം: ദൈവദാസൻ മാർ ഈവാനിയോസ് മെത്രാപ്പോലീത്തായുടെ ഓർമപ്പെരുന്നാളിനോടനുബന്ധിച്ച് പട്ടത്തെ കബറിങ്കലേക്കുള്ള തീർഥാടന പദയാത്ര നാളെ മുതൽ മലങ്കര കത്തോലിക്ക യുവജനപ്രസ്ഥാനത്തിന്റെ നേതൃത്വത്തിൽ നടക്കും. രാവിലെ ഒമ്പതിന് മാവേലിക്കര പുതിയകാവിലെ ദൈവദാസൻ മാർ ഈവാനിയോസ് ജന്മഗൃഹത്തിൽനിന്ന് ആരംഭിക്കുന്ന പദയാത്ര ബിഷപ് ജോഷ്വാ മാർ ഇഗ്നാത്തിയോസ് ഉദ്ഘാടനം ചെയ്യും. കറ്റാനം, കടമ്പനാട്, പുത്തൂർ, കല്ലുവാതുക്കൽ, ആറ്റിങ്ങൽ വഴി 14ന് കബറിടത്തിൽ എത്തിച്ചേരും.
റാന്നി- പെരുന്നാട്ടിൽനിന്ന് ആരംഭിക്കുന്ന പ്രധാന പദയാത്ര 10 ന് തിങ്കളാഴ്ച രാവിലെ ഒമ്പതിന് കർദിനാൾ മാർ ബസേലിയോസ് ക്ലീമിസ് കാതോലിക്കാബാവാ ഉദ്ഘാടനം ചെയ്യും. ഈ വർഷത്തെ പ്രധാന പദയാത്രയിൽ കാതോലിക്കാബാവാ ആദ്യാവസാനം പങ്കെടുക്കും. വടശേരിക്കര, പത്തനംതിട്ട, അടൂർ, കൊട്ടാരക്കര, ആയൂർ, പിരപ്പൻകോട് വഴി പ്രധാന പദയാത്ര 14 ന് വൈകിട്ട് പട്ടം സെന്റ് മേരീസ് കത്തീഡ്രലിലെ കബറിങ്കൽ എത്തിച്ചേരും.
തിരുവല്ല സെന്റ് ജോണ്സ് കത്തീഡ്രലിൽനിന്ന് ആരംഭിക്കുന്ന പദയാത്ര 11ന് വൈകിട്ട് ആരംഭിക്കും. ആർച്ചുബിഷപ് തോമസ് മാർ കൂറിലോസ് ഉദ്ഘാടനം ചെയ്യും. 12ന് വൈകിട്ട് അടൂരിൽ വച്ച് പ്രധാന പദയാത്രയുമായി സംഗമിക്കും. മാർത്താണ്ഡം രൂപതയിൽ നിന്നുള്ള തെക്കൻ മേഖലാ പദയാത്ര13ന് രാവിലെ ക്രിസ്തുരാജാ കത്തീഡ്രലിൽ നിന്നും ആരംഭിക്കും. ബിഷപ് വിൻസന്റ് മാർ പൗലോസ് ഉദ്ഘാടനം ചെയ്യും. നെയ്യാറ്റിൻകര, പാറശാല വൈദികജില്ലാ പദയാത്രകൾ തെക്കൻ മേഖലാ പദയാത്രയുമായി സംഗമിക്കും.
പൂന, പഞ്ചാബ്, ഡൽഹി, ഒഡീഷ, പുത്തൂർ, ബത്തേരി, ഗൾഫ് രാജ്യങ്ങൾ എന്നിവിടങ്ങളിൽ നിന്നുള്ള തീർഥാടകർ 14ന് രാവിലെ പിരപ്പൻകോട് പ്രധാന പദയാത്രയുമായി ചേരും. തിരുവനന്തപുരം മേജർ അതിരൂപതയിലെ വിവിധ വൈദികജില്ലാ കേന്ദ്രങ്ങളിൽ നിന്ന് ആരംഭിക്കുന്ന പദയാത്ര വിവിധ സ്ഥലങ്ങളിൽ പ്രധാന പദയാത്രയുമായി സംഗമിക്കും. പ്രധാന പദയാത്രയ്ക്ക് എംസിവൈഎം സഭാതല സമിതിയും തിരുവനന്തപുരം മേജർ അതിഭദ്രാസന സമിതിയും പത്തനംതിട്ട രൂപതാ സമിതിയും നേതൃത്വം നൽകും. ഓർമപ്പെരുന്നാൾ 15 ന് സമാപിക്കും.