India - 2024
മേജർ ആര്ച്ച് ബിഷപ്പ് ഹൗസിൽ ചരിത്ര മ്യൂസിയം തുറന്നു
സ്വന്തം ലേഖകന് 26-07-2017 - Wednesday
തിരുവനന്തപുരം: പട്ടം ആർച്ച് ബിഷപ് ഹൗസിൽ ബേത് ദുക്റോനെ’ (ഓർമകളുടെ ഭവനം) എന്നു നാമകരണം ചെയ്യപ്പെട്ടിരിക്കുന്ന ചരിത്ര മ്യൂസിയം തുറന്നു. മേജർ ആർച്ച് ബിഷപ്സ് ഹൗസിന്റെ രണ്ടാം നിലയില് സജ്ജീകരിച്ചിരിക്കുന്ന മ്യൂസിയം ആർച്ച്ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാബായാണ് ഉദ്ഘാടനം ചെയ്തത്. ഓർമകളിലൂടെയാണു ജീവിതത്തിന്റെ താളങ്ങൾ മനസിലേക്കു കടന്നുവരുന്നതെന്നു കർദിനാൾ മാർ ബസേലിയോസ് ക്ലീമിസ് കാതോലിക്കാബാവ പറഞ്ഞു. മലങ്കര കത്തോലിക്കാ സഭയ്ക്ക് ലഭിച്ചിട്ടുള്ള ഏറ്റവും വലിയ അനുഗ്രഹം പൊതുസമൂഹവുമായുള്ള ബന്ധമാണെന്നും കർദിനാൾ കൂട്ടിച്ചേർത്തു.
സഭാ തലവൻമാരും തിരുവനന്തപുരം അതിഭദ്രാസനത്തിന്റെ അധ്യക്ഷന്മാരുമായിരുന്ന ദൈവദാസൻ ആർച്ച്ബിഷപ് ഗീവർഗീസ് മാർ ഈവാനിയോസ്, ആർച്ച്ബിഷപ് ബനഡിക്ട് മാർ ഗ്രിഗോറിയോസ്, മേജർ ആർച്ച്ബിഷപ് സിറിൽ മാർ ബസേലിയോസ് കാതോലിക്കാബാവാ എന്നിവരുടെ ഭരണകാലഘട്ടങ്ങൾ തിരിച്ചാണ് ചരിത്ര രേഖകളും, ചിത്രങ്ങളും വ്യക്തിപരമായി ഉപയോഗിച്ചിരുന്ന സാധനങ്ങളും മ്യൂസിയത്തിൽ പ്രദർശിപ്പിച്ചിരിക്കുന്നത്.
മലങ്കര പുനരൈക്യ രേഖകൾ, റോമിൽനിന്നു ലഭിച്ചിട്ടുള്ള കല്പനകൾ, ആർച്ച്ബിഷപ് മാർ ഈവാനിയോസ് രചിച്ച കൈയെഴുത്ത് പ്രതികൾ, അംശവസ്ത്രങ്ങൾ, ഉപകരണങ്ങൾ, അംശവടി, ആർച്ച്ബിഷപ് ബനഡിക്ട് മാർ ഗ്രിഗോറിയോസും സിറിൽ മാർ ബസേലിയോസ് കാതോലിക്കാബാവായും ഉപയോഗിച്ചിട്ടുള്ള അംശവടി, മോതിരം, അംശവസ്ത്രങ്ങൾ, ഉപകരണങ്ങൾ, മാർപാപ്പാമാരുമായി നടത്തിയിട്ടുള്ള കത്തുകൾ, റോമിൽ നിന്നു ലഭിച്ചിട്ടുള്ള നിയമന ഉത്തരവുകൾ എന്നിവ മ്യൂസിയത്തിൽ പ്രദർശിപ്പിച്ചിട്ടുണ്ട്.