India - 2024
29ാമത് അല്ഫോന്സാ തീര്ത്ഥാടനം ശനിയാഴ്ച
സ്വന്തം ലേഖകന് 03-08-2017 - Thursday
ചങ്ങനാശേരി: ചങ്ങനാശേരി അതിരൂപതാ ചെറുപുഷ്പ മിഷൻലീഗിന്റെ ആഭിമുഖ്യത്തിൽ വിശുദ്ധ അൽഫോൻസാമ്മയുടെ ജന്മഗൃഹത്തിലേക്കും കുടമാളൂർ ഫൊറോനാ പള്ളിയിലേക്കും നടത്തുന്ന 29-ാമത് അൽഫോൻസാ തീര്ത്ഥാടനം ആഗസ്റ്റ് 5 ശനിയാഴ്ച നടക്കും. മിഷനെ അറിയുക മിഷനുവേണ്ടി പ്രാർത്ഥിക്കുക എന്ന ലക്ഷ്യവുമായാണു സപ്തതി വർഷത്തിൽ കുഞ്ഞുമിഷനറിമാർ തീർത്ഥാടനത്തിനായി ഒരുങ്ങുന്നത്. മിഷൻലീഗ് അംഗങ്ങളുടെ നേതൃത്വത്തിൽ പ്രായഭേദമെന്യേ പതിനായിരങ്ങൾ തീർത്ഥാടനത്തിൽ പങ്കെടുക്കും.
ആഗസ്റ്റ് 5നു രാവിലെ 5.30ന് വെട്ടിമുകൾ, ചെറുവാണ്ടൂർ, പള്ളിക്കുന്ന്, കോട്ടയ്ക്കപ്പുറം എന്നീ സ്ഥലങ്ങളിൽനിന്ന് അതിരമ്പുഴ മേഖലയുടെ തീർത്ഥാടനവും രാവിലെ 5.45ന് പാറേൽ മരിയൻ തീർഥാടനകേന്ദ്രത്തിൽനിന്നു ചങ്ങനാശേരി, തുരുത്തി മേഖലകളുടെ തീർത്ഥാടനവും രാവിലെ ഏഴിനു പനമ്പാലം സെന്റ് മൈക്കിൾസ് ചാപ്പലിൽനിന്നു കുടമാളൂർ മേഖലയുടെ തീർത്ഥാടനവും ആരംഭിക്കും.
ആലപ്പുഴ, എടത്വാ, പുളിങ്കുന്ന്, ചന്പക്കുളം മേഖലകളിലെ തീർത്ഥാടകർ വിശുദ്ധ ചാവറയച്ചന്റെ കബറിടം സ്ഥിതി ചെയ്യുന്ന മാന്നാനം ആശ്രമ ദേവാലയത്തിൽ അന്നേ ദിവസം രാവിലെ 9.45ന് എത്തിച്ചേർന്നു മധ്യസ്ഥപ്രാർഥനയിൽ പങ്കെടുക്കും. തുടർന്ന് കുടമാളൂരിലേക്കു പദയാത്രയായി നീങ്ങും. അൽഫോൻസാ ജന്മഗൃഹത്തിലും കുടമാളൂർ പള്ളിയിലും രാവിലെ മുതല് വിശുദ്ധ കുര്ബാനയര്പ്പണം നടക്കും. തീര്ത്ഥാടനത്തിനുള്ള ഒരുക്കങ്ങൾ പൂർത്തിയായതായി അതിരൂപതാ മിഷൻലീഗ് ഡയറക്ടർ റവ.ഡോ.ജോബി കറുകപ്പറമ്പിൽ പറഞ്ഞു.