തിരുവനന്തപുരം: കേരള മദ്യവിരുദ്ധ ജനകീയ മുന്നണിയുടെ ആഭിമുഖ്യത്തിൽ സെക്രട്ടേറിയറ്റിനു മുന്നിൽ അനിശ്ചിതകാല സത്യാഗ്രഹം ആരംഭിച്ചു. സത്യഗ്രഹം ലത്തീൻ അതിരൂപത ആർച്ച്ബിഷപ് ഡോ. എം. സൂസപാക്യം ഉദ്ഘാടനം ചെയ്തു. മദ്യശാല സ്ഥാപിക്കുന്നതിൽ തദ്ദേശസ്ഥാപനങ്ങളുടെ നിയന്ത്രണാധികാരം ഇല്ലാതാക്കുന്ന ബില്ല് നിയമസഭയിൽ പാസാക്കരുതെന്നു അദ്ദേഹം പറഞ്ഞു.
കേരള മദ്യവിരുദ്ധ ജനകീയ മുന്നണി ചെയർമാൻ ബിഷപ് ഡോ. ജോഷ്വാ മാർ ഇഗ്നാത്തിയോസ് അധ്യക്ഷ പ്രസംഗം നടത്തി. സത്യഗ്രഹ സമിതി വർക്കിംഗ് ചെയർമാൻ ഫാ. വർഗീസ് മുഴുത്തേറ്റ് വിസി, മദ്യവിരുദ്ധ ജനകീയ മുന്നണി ജനറൽ കണ്വീനർ ഇയ്യച്ചേരി കുഞ്ഞികൃഷ്ണൻ, ഒ.കെ. കുഞ്ഞിക്കോമു എന്നിവർ സത്യഗ്രഹത്തിനു തുടക്കം കുറിച്ചു.
പാളയം ഇമാം വി.പി. സുഹൈബ് മൗലവി, തിരുവനന്തപുരം ലത്തീൻ അതിരൂപത വികാരി ജനറാൾ മോണ്. യൂജിൻ പെരേര, ഗാന്ധിസ്മാരക നിധി സെക്രട്ടറി പി. ഗോപിനാഥൻനായർ, ഡോ. രാധാകൃഷ്ണൻ, അഡിക് ഇന്ത്യ ഡയറക്ടർ ജോണ്സണ് ഇടയാറന്മുള, മദ്യവിരുദ്ധ മുന്നണി ജില്ലാ ചെയർമാൻ വി.എസ്. ഹരീന്ദ്രനാഥ്, മദ്യവിരുദ്ധ മുന്നണി ജില്ലാ കണ്വീനർ എഫ്.എം. ലാസർ, ഒ.കെ. കുഞ്ഞിക്കോമു മാസ്റ്റർ, ഡോ.കെ. രാമചന്ദ്രൻ തുടങ്ങിയവർ പ്രസംഗിച്ചു.