റിയോ ഡി ജനീറോ: കുടുംബത്തിന്റെ പവിത്രയും മൂല്യവും ലോകത്തോട് സാക്ഷ്യപ്പെടുത്തുവാന്‍ ആദ്യത്തെ ഫാമിലി പ്രൈഡ് പരേഡിന് ബ്രസീല്‍ തയാറെടുക്കുന്നു. ഓഗസ്റ്റ് 10 ശനിയാഴ്ച, റിയോ ഡി ജനീറോയിലെ ബ്രസീലിലെ കോപകബാന ബീച്ചിൽ പ്രാദേശിക സമയം രാവിലെ 9 മണിക്ക് പരിപാടി ആരംഭിക്കും. ഗർഭധാരണം മുതൽ സ്വാഭാവിക മരണം വരെയുള്ള ജീവന്‍ സംരക്ഷിക്കുക എന്നത് എല്ലാ കുടുംബങ്ങളും സംരക്ഷിക്കേണ്ട അടിസ്ഥാന മൂല്യമാണെന്നു നാഷ്ണൽ നെറ്റ്‌വർക്ക് ഇൻ ഡിഫൻസ് ഓഫ് ലൈഫ് ആൻഡ് ഫാമിലിയുടെ സ്ഥാപകയും എക്‌സിക്യൂട്ടീവ് പ്രസിഡൻ്റുമായ സെസെ ലൂസ് ഫേസ്ബുക്കില്‍ കുറിച്ചു.

ഒരു കുടുംബം, പ്രത്യേകിച്ച് ഒരു ക്രിസ്ത്യൻ കുടുംബം ആകാൻ ആഗ്രഹിക്കുന്നവർക്ക് സാക്ഷ്യം നല്‍കാനുള്ള അവസരമാണ് ഇതെന്നു റിയോ ഡി ജനീറോയിലെ ആർച്ച് ബിഷപ്പ് കർദ്ദിനാൾ ഒറാനി ടെംപെസ്റ്റ വീഡിയോയിൽ പറഞ്ഞു. ജീവനും കുടുംബവും സംരക്ഷിക്കുന്നതിനുള്ള ദേശീയ ശൃംഖലയുടെ പ്രവർത്തനമാണിതെന്നും കുടുംബത്തിൻ്റെ പവിത്രത ആഘോഷിക്കാൻ ഇത് ലക്ഷ്യമിടുകയാണെന്നും അദ്ദേഹം കൂട്ടിച്ചേര്‍ത്തു. ആഗസ്റ്റ് 17 ന് ബ്രസീലിയൻ നഗരങ്ങളായ ബ്രസീലിയ, ഫ്ലോറിയാനോപോളിസ് എന്നിവിടങ്ങളിലും പരേഡ് നടക്കും.

ആദ്യത്തെ ഫാമിലി പ്രൈഡ് പരേഡ് സമാധാനപരമായും വിശ്വാസപരമായും പ്രഘോഷണം നടത്താനുള്ള അവസരമാണെന്നും ഐക്യത്തിൻ്റെയും പ്രാർത്ഥനയുടെയും പ്രവർത്തനത്തിൻ്റെയും അവസരം ആയിരിക്കുമെന്നും സെസെ ലൂസ് പറഞ്ഞു. ഗർഭാവസ്ഥയുടെ അവസാന മാസങ്ങളിൽ കഴിയുന്ന, ഏറ്റവും പ്രതിരോധമില്ലാത്തവർ ഉൾപ്പെടെ, എല്ലാ കുട്ടികളുടെയും ജീവനോടുള്ള ആദരവിനു പ്രതിബദ്ധത പ്രകടിപ്പിക്കാനുള്ള അവസരമായും പരിപാടിയെ നിരീക്ഷിക്കുന്നുണ്ട്. ലോകത്തെ ഏറ്റവും വലിയ കത്തോലിക്ക ഭൂരിപക്ഷ രാജ്യങ്ങളിലൊന്നാണ് ബ്രസീല്‍.