''ദൈവത്തിന്റെ വചനം സജീവവും ശക്തിയുള്ളതും ഹൃദയങ്ങളില്‍ പരിവര്‍ത്തനം കൊണ്ടുവരുന്നതിനും ശേഷിയുള്ളതുമാണ്'' - ഫ്രാന്‍സിസ് പാപ്പ.

ഫ്രാന്‍സിസ് പാപ്പയുടെ പത്രോസിനടുത്ത ശുശ്രൂഷയുടെ പത്താം വാര്‍ഷികത്തില്‍ ദൈവവചനത്തോടുള്ള അദ്ദേഹത്തിന്റെ ദര്‍ശനം നമുക്കു ധ്യാന വിഷയമാക്കാം. ഒരു പ്രണയകഥയെന്ന പോലെ വായിക്കേണ്ട ഗ്രന്ഥമല്ല ബൈബിളെന്നും ബൈബിള്‍ വായന പ്രാര്‍ത്ഥനയോടു കൂടിയായിരിക്കണമെന്നും ആ പ്രാര്‍ത്ഥന നമ്മെ ദൈവവുമായുള്ള സംഭാഷണത്തിലേക്കു നയിക്കുമെന്നും പാപ്പ പഠിപ്പിക്കുന്നു. വചനത്തിന്റെ പുതിയൊരു മാംസധാരണമാണ് പ്രാര്‍ത്ഥനയിലൂടെ സംഭവിക്കുന്നത്. ദൈവത്തിന്റെ വചനത്തിന് ലോകത്തെ സന്ദര്‍ശിക്കാന്‍ കഴിയേണ്ടതിന് അതിന് ആതിഥ്യമരുളേണ്ടതും അത് സൂക്ഷിച്ചു വയ്‌ക്കേണ്ടതുമായ ''സക്രാരികള്‍'' ആണ് നമ്മള്‍.