News - 2025
മാര്‍പാപ്പ ഉള്‍പ്പെടുന്ന അഗസ്റ്റീനിയന്‍ സമൂഹത്തിന് പുതിയ പ്രിയോർ ജനറല്‍
പ്രവാചകശബ്ദം 10-09-2025 - Wednesday
റോം: ലെയോ പതിനാലാമന്‍ പാപ്പ അംഗമായ അഗസ്റ്റീനിയന്‍ സന്യാസ സമൂഹത്തിന് പുതിയ പ്രിയോർ ജനറല്‍. 750 വർഷത്തിലേറെ വര്‍ഷം നീണ്ട പാരമ്പര്യമുള്ള സന്യാസ സമൂഹത്തിന്റെ 98-ാമത് പ്രിയോർ ജനറലായി ഫാ. ജോസഫ് ലോറൻസ് ഫാരെൽ, ഒഎസ്എയെയാണ് തെരഞ്ഞെടുത്തിരിക്കുന്നത്. റോമിലെ പൊന്തിഫിക്കൽ പാട്രിസ്റ്റിക് അഗസ്തീനിയാനും ഇൻസ്റ്റിറ്റ്യൂട്ടില്‍ ചൊവ്വാഴ്ച ഉച്ചതിരിഞ്ഞ് നടന്ന തെരഞ്ഞെടുപ്പിലാണ് 73 വോട്ടോടെ അഗസ്റ്റീനിയന്‍ സമൂഹത്തിന് പുതിയ അധ്യക്ഷനെ ലഭിച്ചിരിക്കുന്നത്. 188-ാമത് ജനറൽ ചാപ്റ്ററിലാണ് തെരഞ്ഞെടുപ്പ് നടന്നത്.
ഫാ. അലജാൻഡ്രോ മോറൽ ആന്റൺ, ഒഎസ്എയുടെ പിന്‍ഗാമിയായാണ് അദ്ദേഹം തെരഞ്ഞെടുക്കപ്പെട്ടിരിക്കുന്നത്. അഗസ്റ്റീനിയന്‍ സന്യാസ സമൂഹത്തിന്റെ വികാരി ജനറലും വടക്കേ അമേരിക്കയുടെ അസിസ്റ്റന്റ് ജനറലുമായി സേവനമനുഷ്ഠിച്ചു വരികയായിരിന്നു ഫാ. ജോസഫ് ലോറൻസ്. ഫാ. അലജാൻഡ്രോ, അംഗീകാര മുദ്ര പുതിയ പ്രിയോര്‍ ജനറലിന് കൈമാറി. വളരെയധികം പ്രാർത്ഥനയ്ക്കും ധ്യാനത്തിനും ശേഷം, പരിശുദ്ധാത്മാവിന്റെ മാർഗ്ഗനിർദ്ദേശപ്രകാരമാണ് തെരഞ്ഞെടുപ്പിന് ഫലം കൈവന്നിരിക്കുന്നതെന്ന് സെന്റ് തോമസ് വില്ലനോവ പ്രവിശ്യയുടെ പ്രിയോര്‍ പ്രോവിൻഷ്യാളായ ഫാ. റോബർട്ട് പി. ഹാഗൻ പറഞ്ഞു.
1963 ജൂലൈ 11ന് അമേരിക്കയിലെ പെൻസിൽവാനിയയിലെ ഡ്രെക്സൽ ഹില്ലിൽ ജനിച്ച ഫാ. ജോസഫ് ഫാരെൽ, വില്ലനോവയിലെ അഗസ്റ്റീനിയൻ പ്രോവിന്‍സില്‍ ചേരുകയായിരിന്നു. 1991ൽ തിരുപ്പട്ടം സ്വീകരിച്ചു. പൊന്തിഫിക്കൽ ഗ്രിഗോറിയൻ സർവകലാശാലയിൽ നിന്ന് ദൈവശാസ്ത്രത്തിൽ ഡോക്ടറേറ്റ് നേടി. വിശുദ്ധ അഗസ്റ്റിന്റെ പ്രസംഗങ്ങളിലെ അഗസ്തീനിയൻ ആത്മീയതയെക്കുറിച്ചു അദ്ദേഹം തയാറാക്കിയ പ്രബന്ധം ശ്രദ്ധ നേടിയിരിന്നു. ഇടവക വികാരി, സർവകലാശാല ചാപ്ലെയിൻ, വിവിധ സ്ഥാപനങ്ങളിൽ പ്രൊഫസർ എന്നീ നിലകളിൽ അദ്ദേഹം സേവനമനുഷ്ഠിച്ചിട്ടുണ്ട്. ഇന്ത്യ ഉള്‍പ്പെടെ അന്‍പതിലധികം രാജ്യങ്ങളില്‍ വ്യാപിച്ചിരിക്കുന്ന സന്യാസ സമൂഹമാണ് അഗസ്റ്റീനിയൻ സമൂഹം.
⧪ പ്രവാചകശബ്‌ദത്തിന്റെ ശുശ്രൂഷകളില്‍ ഭാഗഭാക്കാകുമോ?
