Purgatory to Heaven - November 2018

അനുഗ്രഹീതരായ ആത്മാക്കളുടെ വിലാപം

സ്വന്തം ലേഖകന്‍ 22-11-2017 - Wednesday

“ദൈവമേ, അങ്ങയുടെ കാരുണ്യത്തിനൊത്ത് എന്നോടു ദയ തോന്നണമേ! അങ്ങയുടെ കാരുണ്യാതിരേകത്തിനൊത്ത് എന്റെ അതിക്രമങ്ങള്‍ മായിച്ചുകളയണമേ! എന്റെ അകൃത്യം നിശ്‌ശേഷം കഴുകിക്കളയണമേ! എന്റെപാപത്തില്‍ നിന്ന് എന്നെ ശുദ്ധീകരിക്കണമേ” (സങ്കീ 51: 1-2).

ശുദ്ധീകരണ സ്ഥലത്തെ ആത്മാക്കൾക്കു വേണ്ടി പ്രാർത്ഥിക്കാം: നവംബര്‍ 22

"ഒരു സ്വര്‍ഗ്ഗീയ പ്രകാശത്തിനു നമ്മുടെ നയനങ്ങളെ മറച്ചിട്ടുള്ള മൂടുപടത്തെ മാറ്റുവാന്‍ കഴിയുമെങ്കില്‍, നമുക്ക് ഒരു കാര്യം കാണുവാൻ സാധിക്കും- നമ്മളുടെ സഹായം അപേക്ഷിച്ചുകൊണ്ട് ശുദ്ധീകരണസ്ഥലത്തെ സഹനമനുഭവിക്കുന്ന ആത്മാക്കള്‍ അവരുടെ കൈകള്‍ ഉയര്‍ത്തിപ്പിടിച്ചുകൊണ്ട് ഓരോസ്ഥലങ്ങളിലായി ചുറ്റിപ്പറ്റി നടക്കുന്നത്. ‘എന്നോട് ദയ കാണിക്കുക, എന്നോട് ദയകാണിക്കുക! ഞങ്ങളില്‍ കരുണയുള്ളവരായിരിക്കുക, ഞങ്ങൾക്കു വേണ്ടി ഒരു കുരിശിന്റെ വഴി ചൊല്ലുക എന്ന് അഭ്യർത്ഥിച്ചുകൊണ്ട് നമുക്കുചുറ്റും നടക്കുന്ന ഇത്തരം ആത്മാക്കളെ നമുക്കു കാണുവാൻ സാധിക്കും"

(പോര്‍ട്ട് മോറിസിലെ വിശുദ്ധ ലിയോനാര്‍ഡ്).

വിചിന്തനം:

വെള്ളിയാഴ്ചകളില്‍ നമ്മുടെ ഭവനങ്ങളിലോ അല്ലെങ്കില്‍ ദേവാലയത്തിലോ ശുദ്ധീകരണസ്ഥലത്തെ ആത്മാക്കള്‍ക്കായി കുരിശിന്റെ വഴി ചൊല്ലുക.

പ്രാര്‍ത്ഥന:

നിത്യപിതാവേ! അവിടുത്തെ പ്രിയപുത്രനും ഞങ്ങളുടെ ഏകകര്‍ത്താവുമായ യേശുക്രിസ്തുവിന്‍റെ തിരുരക്തം ഇന്ന് ലോകമെമ്പാടും അര്‍പ്പിക്കപ്പെടുന്ന ദിവ്യബലികളോട് ചേര്‍ത്ത് ശുദ്ധീകരണ സ്ഥലത്തിലെ എല്ലാ ശുദ്ധാത്മാക്കള്‍ക്കു വേണ്ടിയും ലോകം മുഴുവനിലുമുള്ള എല്ലാ പാപികള്‍ക്കു വേണ്ടിയും തിരുസഭയിലുള്ള എല്ലാ പാപികള്‍ക്കു വേണ്ടിയും എന്‍റെ കുടുംബത്തിലും തലമുറകളിലുള്ളവര്‍ക്കു വേണ്ടിയും ഞാന്‍ കാഴ്ച വയ്ക്കുന്നു.

1 സ്വര്‍ഗ്ഗ. 1 നന്മ. 1 ത്രിത്വ.

(വി. ജെര്‍ത്രൂദിനോട് കര്‍ത്താവ് പറഞ്ഞു: "ഈ പ്രാര്‍ത്ഥന ഓരോ പ്രാവശ്യം ചൊല്ലുമ്പോഴും ആയിരം ആത്മാക്കളെ ശുദ്ധീകരണ സ്ഥലത്തു നിന്ന്‍ സ്വര്‍ഗ്ഗത്തിലേക്ക് ഞാന്‍ കൊണ്ടുപോകുന്നു". ആയതിനാല്‍, നമുക്കും ഈ പ്രാര്‍ത്ഥന ഏറ്റുപറഞ്ഞ് ശുദ്ധീകരണ സ്ഥലത്തെ ആത്മാക്കൾക്കു വേണ്ടി പ്രാർത്ഥിക്കാം.)

'പ്രവാചക ശബ്ദം' വെബ്സൈറ്റില്‍ 365 ദിവസവും ശുദ്ധീകരണസ്ഥലത്തെ ആത്മാക്കള്‍ക്ക് വേണ്ടി പ്രാര്‍ത്ഥിക്കുവാന്‍ സഹായിക്കുന്ന ധ്യാനചിന്തകള്‍ കലണ്ടര്‍ രൂപത്തില്‍ ലഭ്യമാണ്. ഓരോ ദിവസത്തെയും ധ്യാനചിന്തകള്‍ വായിക്കുവാന്‍ ഇവിടെ ക്ലിക്ക് ചെയ്യുക.


Related Articles »