റോം: ലോകത്തെ ഏറ്റവും വലിയ കോടീശ്വരനായ ഇലോൺ മസ്‌കിന്‍റെ ഇളയ സഹോദരന്‍ കിംബാൽ മസ്‌ക്, റോം മേയർ റോബർട്ടോ ഗ്വാൾട്ടിയേരിയുമായി കൂടിക്കാഴ്ച നടത്തി. ആഗോള കത്തോലിക്ക സഭ പ്രത്യേകമായി കൊണ്ടാടുന്ന 2025 ജൂബിലി വര്‍ഷാചരണത്തിന്റെ ഭാഗമായി സംഗീത അകമ്പടിയോടെ ഡ്രോണ്‍ ഷോ നടത്തുക എന്ന ലക്ഷ്യത്തോടെയാണ് കൂടിക്കാഴ്ച നടന്നതെന്ന് വിവിധ മാധ്യമങ്ങള്‍ റിപ്പോര്‍ട്ട് ചെയ്യുന്നു. കഴിഞ്ഞ ദിവസം, അദ്ദേഹം ഇറ്റാലിയൻ പ്രധാനമന്ത്രി ജോർജിയ മെലോണിയെ പലാസോ ചിഗിയിൽ സന്ദർശിച്ചിരിന്നു. ഇറ്റലിയിലെ എലോൺ മസ്‌കിൻ്റെ പ്രതിനിധി ആൻഡ്രിയ സ്ട്രോപ്പ, വെറോണിക്ക ബെർട്ടി എന്നിവരുടെ ഒപ്പമായിരിന്നു കൂടിക്കാഴ്ച.

ജൂബിലിയുടെ വത്തിക്കാനിലെ ചീഫ് ഓർഗനൈസർ ആർച്ച് ബിഷപ്പ് റിനോ ഫിസിചെല്ലയുമായി സംഗീത ഡ്രോൺ ഷോയുടെ ആശയം കിംബാൽ മസ്‌ക് പങ്കുവെയ്ക്കുമെന്ന് ഇറ്റാലിയൻ പത്രമായ ലാ സ്റ്റാമ്പ റിപ്പോര്‍ട്ട് ചെയ്തിട്ടുണ്ട്. ടെസ്‌ലയുടെ ബോർഡ് മെമ്പര്‍ കൂടിയായ കിമ്പാൽ മസ്‌ക്, വലിയ തോതിലുള്ള ലൈറ്റ് ഡിസ്‌പ്ലേകൾ നിർമ്മിക്കാൻ കഴിവുള്ള 9,000 നൂതന ഡ്രോണുകളുടെ കമ്പനിയായ നോവ സ്കൈ സ്റ്റോറീസ് ഉടമ കൂടിയാണ്. ഒളിമ്പിക്സ് ഗെയിംസ്, സൂപ്പർ ബൗൾ ഹാഫ്‌ടൈം ഷോ, ഇൻ്റർനാഷണൽ എക്‌സ്‌പോസ് തുടങ്ങിയ പരിപാടികളിൽ ഇവരുടെ കമ്പനി അവതരിപ്പിക്കുന്ന ഡ്രോൺ ഷോകൾ സമീപ വർഷങ്ങളിൽ ജനശ്രദ്ധ നേടിയിരിന്നു.

2023-ൽ കൊളോസിയത്തിന് മുകളിലാണ് റോം അതിൻ്റെ ആദ്യത്തെ ഡ്രോൺ ഷോ നടത്തിയത്. ലൈറ്റ് ഷോ സാങ്കേതികവിദ്യ വത്തിക്കാനില്‍ ഇതിന് മുന്‍പ് പ്രദര്‍ശിപ്പിച്ചത് 2022-ലാണ്. സെൻ്റ് പീറ്റേഴ്‌സ് ബസിലിക്കയുടെ മുൻഭാഗത്തു 3-ഡി പ്രൊജക്ഷൻ മാപ്പിംഗ് ഉപയോഗിച്ചായിരിന്നു അന്ന് പ്രദര്‍ശനം. 2025 ജൂബിലി വര്‍ഷത്തില്‍ വിവിധങ്ങളായ പരിപാടികള്‍ക്കായി വത്തിക്കാന്‍ തയാറെടുക്കുകയാണ്. ഈ പശ്ചാത്തലത്തില്‍ ഡ്രോൺ ഷോയുടെ സാക്ഷാത്കാരത്തിന് വത്തിക്കാന്‍റെ പൂര്‍ണ്ണ അനുമതി ഇപ്പോഴും ആവശ്യമാണ്. വിഷയത്തില്‍ ചര്‍ച്ച തുടരുകയാണെന്നാണ് പുറത്തുവരുന്ന വിവരം.

♦️ കര്‍ത്താവിന്റെ സത്യവചനം അനേകരിലേക്ക് എത്തിക്കുവാന്‍ 'പ്രവാചകശബ്‌ദ'ത്തെ സഹായിക്കാമോ? ♦️