India - 2024
പൗരോഹിത്യ സുവർണ ജൂബിലി നിറവിൽ ഫാ. ജോർജ്ജ് മഠത്തിപറമ്പിൽ
സ്വന്തം ലേഖകന് 01-08-2017 - Tuesday
കൊച്ചി: സീറോ മലബാർ സഭയുടെ ഉന്നതവിദ്യാഭ്യാസ കമ്മീഷൻ, പബ്ലിക് അഫയേഴ്സ് വിഭാഗം എന്നിവയുടെ സെക്രട്ടറിയും വിദ്യാഭ്യാസ വിചക്ഷണനുമായ റവ. ഡോ. ജോർജ് മഠത്തിപ്പറമ്പിലിന്റെ പൗരോഹിത്യ സുവർണജൂബിലി ആഘോഷം ഈ വരുന്ന ശനിയാഴ്ച (ആഗസ്റ്റ് 5) നടക്കും. ചങ്ങനാശേരി അതിരൂപതയിലെ ആലപ്പുഴ തത്തംപള്ളി സെന്റ് മൈക്കിൾസ് പള്ളിയിൽ രാവിലെ ഒന്പതിനു കൃതജ്ഞതാബലിയോടെ ആരംഭിക്കും.
ചങ്ങനാശേരി ആർച്ച്ബിഷപ് മാർ ജോസഫ് പെരുന്തോട്ടം വചനസന്ദേശം നൽകും. തുടർന്നു നടക്കുന്ന അനുമോദന സമ്മേളനം സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി ഉദ്ഘാടനംചെയ്യും. മാർ ജോസഫ് പെരുന്തോട്ടം അധ്യക്ഷത വഹിക്കും. റവ. ഡോ. മഠത്തിപ്പറമ്പിലിന്റെ പുതിയ ഗ്രന്ഥം ആർച്ച്ബിഷപ് ഡോ. ഫ്രാൻസിസ് കല്ലറയ്ക്കലിനു നൽകി മേജർ ആർച്ച്ബിഷപ് പ്രകാശനംചെയ്യും. ബിഷപ്പുമാരായ മാർ തോമസ് തറയിൽ, ഡോ. സ്റ്റീഫൻ അത്തിപ്പൊഴിയിൽ, മുൻ വൈസ് ചാൻസലർമാരായ ഡോ. സിറിയക് തോമസ്, ഡോ. ജാൻസി ജയിംസ് തുടങ്ങിയവർ പ്രസംഗിക്കും.
1967 ഡിസംബർ 18നാണ് ജോർജ് മഠത്തിപ്പറമ്പില് പൗരോഹിത്യം സ്വീകരിച്ചത്. ചങ്ങനാശേരി എസ്ബി കോളജ് പ്രിൻസിപ്പൽ, പ്രിൻസിപ്പൽസ് അസോസിയേഷൻ പ്രസിഡന്റ്, ഓൾ ഇന്ത്യ അസോസിയേഷൻ ഓഫ് ക്രിസ്റ്റ്യൻ ഹയർ എഡ്യൂക്കേഷന്റെ (അയാഷേ) കേരളത്തിൽനിന്നുള്ള ആദ്യത്തെ പ്രസിഡന്റ്, ഇന്റർചർച്ച് കൗണ്സിൽ സെക്രട്ടറി, കെസിബിസി എഡ്യൂക്കേഷൻ സെക്രട്ടറി, യുഎസിലെ ഇന്ത്യാന സ്റ്റേറ്റ് യൂണിവേഴ്സിറ്റി, കാത്തലിക് യൂണിവേഴ്സിറ്റി ഓഫ് അമേരിക്ക, ഫ്ളോറിഡ സെന്റ് തോമസ് യൂണിവേഴ്സിറ്റി എന്നിവിടങ്ങളിൽ പ്രഫസർ, ഷിക്കാഗോ രൂപതയുടെ പ്രഥമ വികാരി ജനറാൾ എന്നീ നിലകളിൽ പ്രവർത്തിച്ചിട്ടുണ്ട്.