India - 2024
മാര് ഈവാനിയോസിന്റെ ഓര്മ്മപ്പെരുന്നാളിനോടനുബന്ധിച്ച് നടന്ന മെഴുകുതിരി പ്രദക്ഷിണം ഭക്തിസാന്ദ്രം
സ്വന്തം ലേഖകന് 15-07-2017 - Saturday
തിരുവനന്തപുരം: മലങ്കര പുനരൈക്യ പ്രസ്ഥാനത്തിന്റെ ശില്പിയും ബഥനി സമൂഹ സ്ഥാപകനും തിരുവനന്തപുരം അതിഭദ്രാസനത്തിന്റെ പ്രഥമ മെത്രാപ്പോലീത്തായുമായ ദൈവദാസൻ ആർച്ച്ബിഷപ് മാർ ഈവാനിയോസിന്റെ 64-ാം ഓർമപ്പെരുനാളിനോടനുബന്ധിച്ചു പട്ടം സെന്റ് മേരീസ് കത്തീഡ്രലിൽ നടന്ന മെഴുകുതിരി പ്രദക്ഷിണം ഭക്തിസാന്ദ്രമായി. ഇന്നലെ വൈകീട്ട് കർദിനാൾമാരായ മാർ ബസേലിയോസ് ക്ലീമിസ് കാതോലിക്കാ ബാവ, മാർ ജോർജ് ആലഞ്ചേരി എന്നിവരുടെ നേതൃത്വത്തിൽ നടന്ന പ്രദക്ഷിണത്തിൽ ആയിരക്കണക്കിനു വിശ്വാസികളാണ് അണിചേര്ന്നത്. വിവിധസ്ഥലങ്ങളില് നിന്നുള്ള മെത്രാപ്പോലീത്താമാരും പ്രാര്ത്ഥനാനിര്ഭരമായ പ്രദക്ഷിണത്തില് പങ്കാളികളായി.
നേരത്തെ മാവേലിക്കര, മാർത്താണ്ഡം, റാന്നി പെരുന്നാട് എന്നിവിടങ്ങളിൽ നിന്ന് ആരംഭിച്ച തീർഥാടന പദയാത്രകൾ ഇന്നലെ വൈകിട്ട് അഞ്ചോടു കൂടി കബറിടത്തിൽ എത്തിച്ചേർന്നു. പെരുന്നാട്ടിൽ നിന്നുള്ള പദയാത്രയിൽ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ ആദ്യാവസാനം പങ്കെടുത്തുവെന്നത് ശ്രദ്ധേയമാണ്. ആർച്ച് ബിഷപ് തോമസ് മാർ കൂറിലോസ്, ബിഷപ് തോമസ് മാർ അന്തോണിയോസ് എന്നിവരും ബാവായോടൊപ്പം പദയാത്രയിൽ പങ്കെടുത്തു.
ഇന്ന് രാവിലെ നടക്കുന്ന ആഘോഷമായ സമൂഹബലിയിൽ മേജർ ആർച്ചുബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാബാവാ മുഖ്യകാർമികനായിരിക്കും. മലങ്കര സുറിയാനി കത്തോലിക്കാ സഭയിലെ എല്ലാ മെത്രാപ്പോലീത്തമാരും അഞ്ഞൂറോളം വൈദികരും സഹകാർമികരായിരിക്കും. സീറോ മലബാർ സഭാ മേജർ ആർച്ചുബിഷപ് കർദിനാൾ മാർ ജോർജ് ആലഞ്ചേരി വചനസന്ദേശം നൽകും.