വത്തിക്കാന്‍ സിറ്റി: മുറിവേറ്റ ഹൃദയങ്ങളെ സുഖപ്പെടുത്തുകയും ഭയത്തിന്റെയും സ്വാർത്ഥതയുടെയും വിദ്വേഷത്തിന്റെയും ചങ്ങലകൾ തകർക്കുകയും ചെയ്യുന്ന "സമാധാനത്തിന്റെ ആത്മാവാണ്" പരിശുദ്ധാത്മാവെന്നു ലെയോ പതിനാലാമൻ മാർപാപ്പ. പന്തക്കുസ്ത തിരുനാള്‍ ദിനമായ ഇന്നലെ വത്തിക്കാനിലെ സെന്‍റ് പീറ്റേഴ്സ് ബസിലിക്കയില്‍ വിശുദ്ധ കുർബാന അര്‍പ്പിച്ചു സന്ദേശം നല്‍കുകയായിരിന്നു പാപ്പ. പരിശുദ്ധാത്മാവിന്റെ പരിവർത്തന ശക്തിയെക്കുറിച്ച് പാപ്പ സന്ദേശത്തില്‍ ഉടനീളം പരാമര്‍ശിച്ചു.

പരിശുദ്ധാത്മാവാണ് ഭയപ്പെട്ട അപ്പോസ്തലന്മാരെ സുവിശേഷത്തിന്റെ ധീര സാക്ഷികളാക്കി മാറ്റിയതെന്നു പാപ്പ അനുസ്മരിച്ചു. യുദ്ധം, വിദ്വേഷം, ഭിന്നത എന്നിവയാൽ മുറിവേറ്റ ലോകത്ത് സമാധാനത്തിന്റെയും ക്ഷമയുടെയും ഐക്യത്തിന്റെയും ഉപകരണങ്ങളായി മാറേണ്ടതുണ്ട്. ദൈവത്തിന്റെ ക്ഷമ സ്വീകരിക്കുന്നതിലൂടെയും അതേ കാരുണ്യം മറ്റുള്ളവർക്ക് നൽകുന്നതിലൂടെയുമാണ് യഥാർത്ഥ സമാധാനം ആരംഭിക്കുന്നതെന്ന് പാപ്പ വിശ്വാസികളെ ഓർമ്മിപ്പിച്ചു.

പരിശുദ്ധാത്മാവിലൂടെ പ്രവർത്തിക്കുന്ന ക്രിസ്തുവിന്റെ സ്നേഹം കൂടാതെ മനുഷ്യർക്ക് അക്രമത്തെയും വിഭജനത്തെയും മറികടക്കാൻ കഴിയില്ല. ശിഷ്യന്മാർ ഒരുകാലത്ത് ഭയപ്പെട്ടു അടച്ചിട്ട വാതിലുകൾക്ക് പിന്നിൽ ഒളിച്ചിരുന്നു. എന്നാല്‍, പരിശുദ്ധാത്മാവിനെ സ്വീകരിച്ചതിനുശേഷം, അവർ ധൈര്യത്തോടെ ലോകത്തോട് സുവിശേഷം പ്രഖ്യാപിച്ചു. ഇതിനു സമാനമായി ഭയത്തിലോ നിസ്സംഗതയിലോ കുടുങ്ങിക്കിടക്കാതെ, സമൂഹത്തിൽ ക്രിസ്തുവിന്റെ സന്തോഷിക്കുന്ന സാക്ഷികളാകാൻ അദ്ദേഹം ക്രൈസ്തവരോട് ആഹ്വാനം ചെയ്തു.

♦️ 'പ്രവാചകശബ്‌ദ'ത്തെ സഹായിക്കാമോ? ♦️