India - 2025
സന്യാസം ദൈവിക കൂട്ടായ്മയിലേക്കുള്ള വിളി: ആര്‍ച്ച് ബിഷപ്പ് കുര്യാക്കോസ് സേവറിയോസ്
സ്വന്തം ലേഖകന്‍ 26-10-2019 - Saturday
കോട്ടയം: സന്യാസം ദൈവിക കൂട്ടായ്മയിലേക്കുള്ള വിളിയും മിശിഹായോട് അടുത്തിരിക്കാനുള്ള പരിശ്രമവുമാണെന്ന്‍ ക്‌നാനായ ആര്‍ച്ച് ബിഷപ്പ് കുര്യാക്കോസ് മാര്‍ സേവറിയോസ്. സിബിസിഐ ഡയലോഗ് ആന്‍ഡ് എക്യുമെനിസം, സീറോ മലബാര്‍ സിനഡല്‍ കമ്മീഷന്‍ ഫോര്‍ എക്യുമെനിസം, മാങ്ങാനം പൗരസ്ത്യ വിദ്യാനികേതന്‍ എന്നിവയുടെ സംയുക്താഭിമുഖ്യത്തില്‍ കോട്ടയം മാങ്ങാനം മിഷനറി ഓറിയന്റേഷന്‍ സെന്ററില്‍ നടന്ന എക്യുമെനിക്കല്‍ സിമ്പോസിയം ഉദ്ഘാടനം ചെയ്യുകയായിരുന്നു അദ്ദേഹം. സിബിസിഐ എക്യുമെനിക്കല്‍ കമ്മീഷന്‍ ആന്‍ഡ് ഡയലോഗ് ചെയര്‍മാന്‍ ആര്‍ച്ച് ബിഷപ്പ് മാര്‍ ജോസഫ് പെരുന്തോട്ടം അധ്യക്ഷനായി. സന്യാസം ആത്മീയ ജീവിതത്തിന്റെ ശക്തിസ്രോതസാണെന്നും സഭയുടെ അടിത്തറ പാകപ്പെട്ടതു സന്യാസ ജീവിതത്തിലാണെന്നും അദ്ദേഹം കൂട്ടിച്ചേര്‍ത്തു.
'സന്യാസം: സഭയുടെ അപ്പസ്‌തോലിക പാരമ്പര്യത്തിന്റെ പ്രകാശനവും ജീവിതവും' എന്ന വിഷയത്തെക്കുറിച്ചു നടന്ന സിമ്പോസിയത്തില്‍ കത്തോലിക്ക ഓര്‍ത്തഡോക്‌സ് സഭാപാരമ്പര്യങ്ങളില്‍ നിന്നുള്ള സന്യാസ പ്രമുഖര്‍ പങ്കെടുത്തു. റവ.ഡോ.സേവ്യര്‍ കൂടപ്പുഴ ആമുഖ പ്രഭാഷണം നടത്തി. സിബിസിഐ ഡയലോഗ് ആന്‍ഡ് എക്യുമെനിസം സെക്രട്ടറി റവ.ഡോ.ജോബി കറുകപ്പറന്പില്‍, എംഒസി പ്രിന്‍സിപ്പല്‍ റവ.ഡോ.തോമസ് കറുകക്കളം, റവ.ഡോ.ജേക്കബ് കിഴക്കേവീട് എന്നിവര്‍ പ്രസംഗിച്ചു.
റവ.ഡോ.കുര്യാക്കോസ് കൊല്ലന്നൂര്‍, റവ.ഡോ.ജോര്‍ജ് തോമസ് ഒഐസി, റവ.ഡോ.സിസ്റ്റര്‍ റോസലിന്‍ എംടിഎസ്, ഡോ.പി.സി. അനിയന്‍കുഞ്ഞ് എന്നിവര്‍ പ്രബന്ധങ്ങള്‍ അവതരിപ്പിച്ചു. മല്പാന്‍ റവ.ഡോ.മാത്യു വെള്ളാനിക്കല്‍, റവ.ഡോ.ആന്റണി കമുകുംപള്ളി, റവ.സിസ്റ്റര്‍ ജിസ് മരിയ എസ്എച്ച് എന്നിവര്‍ മോഡറേറ്റര്‍മാരായിരുന്നു. യാക്കോബായ സിറിയന്‍ ഓര്‍ത്തോഡക്‌സ് മെത്രാപ്പോലീത്ത മാത്യൂസ് മാര്‍ തിമോത്തിയോസ് സമാപന സന്ദേശം നല്‍കി.
